Tsohon Mataimakin Shugaban ƙasa, Atiku Abubakar, ya ce haɗa hanyoyin isar da sakamakon zaɓe ta lantarki da ta hannu na iya haifar da matsaloli a tsarin zaɓe.
Atiku ya bayyana hakan ne a wata hira da manema labarai bayan ziyarar da ya kai tsohon Shugaban Soja, Janar Ibrahim Babangida, a Minna a ranar Talata. Ya ce ‘yan Najeriya sun yi tsammanin samun isar da sakamakon zaɓe gaba ɗaya ta hanyar lantarki a duk matakan zaɓe.
Ya ƙara da cewa, tsarin haɗa hanyoyin lantarki da na hannu na iya kawo rashin gaskiya a zaɓe da kuma haifar da rudani maras buƙata yayin tattara sakamakon.
Ya ce:
“Abin da ‘yan Najeriya suka yi tsammani shi ne isar da sakamakon zaɓe ta lantarki a duk matakan zaɓe. Abin da muka samu kuwa shi ne haɗin hanyoyin lantarki da na hannu, wanda zai haifar da karin rudani kuma zai iya kawo haɗari ga tsarin isar da sakamakon zaɓe.”
Ya jaddada cewa, isar da sakamakon zaɓe a ainihin lokacin ta lantarki shine mafi inganci wajen tabbatar da sahihancin zaɓe a ƙasar.
A gefe guda, Majalisar Dattawa ta kafa Kwamitin Tattaunawa na Dokar Zaɓe mai mambobi 12 domin daidaita bambance-bambancen da ke cikin canje-canjen da aka gabatar a Dokar Zaɓe.
Kwamitin zai yi aiki tare da kwamitinsa a Majalisar Wakilai domin daidaita bambance-bambancen da ke cikin kudurin canji, sannan ya samar da sigar haɗaɗɗiyar dokar da za a mika domin amincewar karshe.
Shugaban Majalisar Dattawa, Godswill Akpabio, ya sanar da mambobin kwamitin a wani taron gaggawa na majalisar a ranar Talata.
Kwamitin taro zai duba wuraren da bangarorin majalisun biyu suka bambanta, ya warware sashe-sashen da ake sabani a kansu kafin a gabatar da takardar da aka daidaita domin amincewa.
RMC HAUSA
Category
Siyasa